O Porriño viviu este luns unha tarde para o recordo. Centos de persoas congregáronse no Pavillón Municipal dos Deportes para tributar unha cálida e merecida homenaxe ao Conservas Orbe Zendal BM Porriño, o equipo feminino que fixo historia ao alcanzar a final da European Cup Feminina 2025, onde se alzaron cun brillante subcampionato europeo.
Máis que unha celebración deportiva, foi unha auténtica manifestación de orgullo, agradecemento e identidade porriñesa. A vila enteira volcouse coas súas xogadoras, artífices desta clasificación histórica grazas ao seu esforzo, paixón e compromiso, nunha tempada excepcional baixo a dirección de Ismael Martínez.
A festa comezou pola tarde coa Festa do Deporte, que ofreceu exhibicións de diversos clubs locais, xogos para todas as idades, música en directo e unha refrescante festa da escuma. A chegada das protagonistas, as xogadoras do primeiro equipo, fíxose nun entrañable tren Chu Chu, onde foron recibidas cunha explosión de aplausos e berros de emoción.
Previamente ao acto central, as xogadoras foron recibidas na Casa Consistorial nun acto institucional onde se lles entregaron as medallas do Centenario do Concello do Porriño. O alcalde, Alejandro Lorenzo, subliñou a transcendencia do equipo: “Hoxe non só festexamos un éxito deportivo, senón o exemplo de superación, traballo en equipo e compromiso que representan estas mozas. O Porriño está orgulloso de vós e sempre estará ao voso lado.”
No pavillón, ás 20:00 horas, a emoción alcanzou o seu punto álxido. Un pasillo de honra, a entrega simbólica do trofeo, unha atronadora ovación e un unánime berro de “¡VIVA PORRIÑO!” resonaron no recinto.
A capitana do equipo, Sarai Samartín Lago, expresou a gratitude de todas: “Este é o trofeo máis valioso, porque está feito de agarimo, de loita compartida e de orgullo colectivo. Grazas, Porriño, por estar sempre connosco.”
O concelleiro de Deportes e presidente do club, Abel Estévez, tamén recoñeceu o traballo do equipo: “Este equipo fixo historia e faino cada día, con humildade, sacrificio e ilusión. A final europea é só o principio de algo moito maior.”
Durante o evento anunciouse, ademais, que o Conservas Orbe Zendal BM Porriño será o pregoeiro oficial das Festas do Cristo 2025, un recoñecemento que reflicte o sentir unánime da vila.
O alcalde, Alejandro Lorenzo, destacou o excelente momento do deporte local, lembrando os numerosos logros dos diferentes clubs e deportistas do Porriño ao longo dos anos. Anunciou tamén a creación da Gala do Deporte do municipio, un evento anual para recoñecer o esforzo da comunidade deportiva local. Ademais, agradeceu o apoio de patrocinadores, clubs, directivas, deportistas e afección.
Con esta emotiva homenaxe, O Porriño recoñeceu o esforzo colectivo, a excelencia deportiva e o exemplo de superación das súas xogadoras, reiterando o seu compromiso co impulso do deporte feminino e o fortalecemento do vínculo entre os clubs e a cidadanía.
