O deporte e as tradicións danse a man coa celebración da XIII Milla Porriñesa “Festas do Cristo”, organizada polo Concello do Porriño en colaboración co Club Atletismo Porriño. O evento terá lugar este sábado 4 de outubro, a partir das 19:00 horas, coa saída e chegada fixadas na céntrica Praza Arquitecto Antonio Palacios.
O Club Atletismo Porriño agarda a participación duns 300 atletas de todas as idades, dende a cativada de 2 anos ata corredores veteranos. A organización lembra que a inscrición é gratuíta e continúa aberta ata a medianoite do venres 3 de outubro a través da páxina web ecultura.net.
O alcalde do Porriño, Alejandro Lorenzo, fixo un chamamento á participación veciñal, destacando o valor da Milla como parte das festas patronais. “A Milla Porriñesa é un exemplo de como o deporte e as nosas tradicións poden ir da man. É unha festa para toda a familia e unha oportunidade para encher as rúas de Porriño de vida e compañeirismo”, sinalou.
Categorías para Todas as Idades
A proba está aberta tanto a atletas federados como non federados e contará con cinco categorías por idades, con distancias adaptadas:
-
Pitufiñas e Pitufiños (2-4 anos): 100 metros.
-
Velociraptores (5-7 anos): 200 metros.
-
Esprinters (8-10 anos): 400 metros.
-
Correcamiños (11-14 anos): 800 metros.
-
Milla Porriñesa (15 anos en diante): 1.609 metros (inclúe Veteranos A e B).
Todos os participantes recibirán medallas ou trofeos segundo a categoría. Ademais, os tres primeiros clasificados absolutos (masculino e feminino) serán premiados coa tradicional bola de pan do Porriño.
Para facilitar a comodidade dos atletas, o Concello porá a disposición vestiarios e duchas no Polideportivo Municipal. Dende a organización fan un último convite para que a veciñanza se sume á carreira, subliñando o carácter familiar, integrador e festivo deste referente deportivo local.
