A Xunta presenta o VIII Concurso de Rondallas da Área Metropolitana de Vigo, que reunirá 18 agrupacións no Ifevi
O director xeral de Cultura, Anxo M. Lorenzo, e a delegada territorial da Xunta en Vigo, Ana Ortiz, presentaron hoxe o VIII Concurso de Rondallas da Área Metropolitana de Vigo, que se celebrará o 17 de xaneiro de 2026 no Ifevi e que contará cunha participación récord de 18 agrupacións, catro máis que na edición anterior.
Durante o acto, o responsable de Cultura subliñou que a cita “volve contar co apoio do Goberno galego no marco do seu compromiso coa preservación e posta en valor deste patrimonio inmaterial”. Nesa liña, destacou o papel das rondallas na difusión da música popular galega e na conservación dunha tradición única no territorio vigués e na súa contorna. Ademais, puxo en valor “o traballo da Federación por consolidar un colectivo que comparte a paixón por esta expresión artística, preservando un legado tan valioso”.
O director xeral lembrou tamén que o xoves 11 de decembro chega aos cines a película Rondallas, dirixida por Daniel Sánchez Arévalo, “que filmou algunhas escenas precisamente durante o certame do ano pasado”, reforzando así a visibilidade destas formacións no ámbito cultural e audiovisual.
Participación de toda a área metropolitana
No concurso participarán rondallas procedentes de Vigo, Mos, O Porriño, Gondomar, Nigrán, Tui, Baiona e Redondela, incorporándose estas dúas últimas como novidade. Cada agrupación reúne arredor de 100 integrantes, que amosan elementos característicos do patrimonio rondalleiro: a combinación de distintos tipos de música, a singularidade da súa vestimenta e o modo particular de desfilar que define a cada formación.
O VIII Concurso de Rondallas do Área Metropolitana de Vigo consolídase así como unha das grandes citas culturais do inverno na comarca, un encontro que fusiona tradición, música e identidade colectiva.