Xulio Fontes remata a súa obra en Quintela de Leirado coa inauguración dun 'Museo ao Aire Libre'

O artista Xulio Fontes regresou á súa terra natal, nas faldras do Penagache, para culminar a súa grande obra plástica. Tras a recente inauguración da exposición 'Ramboia das Artes' no Museo Pura Santos de Entrimo, e coincidindo co nomeamento do Arraiano Maior 2025, o pintor volveu a Forxán (Quintela de Leirado) para finalizar o seu proxecto máis persoal.

A mañá deste domingo, Fontes encamiñou os seus pasos cara á fonte, xusto enfronte da casa de Delfín, para pintar as súas columnas. Con esa mesma paixón que caracteriza os seus trazos e formas, dialogou de novo co territorio que o viu nacer. Esta actuación pon o broche de ouro a un traballo iniciado en 2023, que xa plasmou 32 portas, 4 ventás, 1 balcón, 2 escaleiras, 6 murais, 4 postes e, agora, as columnas da fonte.

A iniciativa, que comezou hai dous anos cun mural de 30 metros, continuou en 2024 con tres máis, ata rematar hoxe, 10 de agosto. Se Patrimonio o autoriza, o artista soña con seguir coa súa obra plástica no lugar onde chegou ao mundo para ser pintor.

O vindeiro sábado, día 16, ás 12.30 h, inaugurarase o "Museo ao Aire Libre", nun acto que será presentado por Aser Álvarez.