A cidade de Vigo mergúllase de cheo no Galician Freaky Film Festival (GFFF), que hoxe estrea unha nova edición consolidándose no circuíto do cinema underground e de xénero. Ata o 27 de setembro, os Cines Tamberlick serán a sede principal deste evento que combina grandes títulos de terror, fantasía e serie B con actividades para todos os públicos.
O festival conta co apoio da Xunta de Galicia a través da Consellería de Cultura, Lingua e Xuventude, que destina fondos para impulsar o circuíto galego de certames audiovisuais estratéxicos.
Unha edición de récord e homenaxe a Luis Barboo
O director da Axencia Galega das Industrias Culturais (Agadic), Jacobo Sutil, participou no acto inaugural e salientou a calidade da programación deste ano. Sutil destacou o recoñecemento ao actor vigués Luis Barboo (1927-2001), unha figura crave do spaghetti western e o fantaterror español que compartiu escena con lendas como Clint Eastwood e Sean Connery. En homenaxe á súa traxectoria, proxectarase "Conan, el bárbaro" o 23 de setembro.
Esta novena edición será a de maior actividade da historia do GFFF, cunha Sección Oficial con 74 curtametraxes de 34 países. O público terá a oportunidade de ver un estrea mundial, dous internacionais e 65 pezas que se proxectarán por vez primeira en Galicia, mostrando a diversidade de estilos que van dende o body horror ata o cinema experimental e o surrealismo.
Dobre sesión inaugural e programación variada
A sesión inaugural trouxo dous clásicos do subxénero Mad Doctors (Médicos Loucos): "Young Frankenstein" e "Bride of re-animator" (1990). Tras a dobre proxección, tivo lugar un coloquio co experto en efectos especiais Ricardo Spencer.
A programación do festival artéllase en 12 bloques temáticos para satisfacer todos os gustos. Ademais, incluirá unha sesión especial, a Corman Night, dedicada á obra do produtor e director de culto Roger Corman, referente do cine de serie B.
O broche de ouro porao o filme de clausura "The Rocky Horror Picture Show", a obra mestra do musical-horror e do cine de estética camp, coñecida por revolucionar a cultura popular e converterse nun fenómeno cinematográfico de participación activa do público que perdura ata hoxe.
O GFFF para os máis novos
O festival pon especial énfase no seu programa infantil e xuvenil, o PequeFreak, unha sección deseñada para que os máis novos poidan achegarse aos xéneros de fantasía e terror dun xeito lúdico, con curtametraxes, longametraxes e un obradoiro de efectos especiais.
O GFFF, dirixido por Juan de Castro, tamén organiza actividades paralelas como encontros con profesionais, a Feira Fantástica e Freak de Galicia e un concurso de banda deseñada.
