'Vértebras': unha serie artística que explora o efémero e o espiritual desde o corpo e a memoria

A artista Ruth Lodeiro presenta Vértebras, unha serie sempre inacabada que revisita e reinterpreta ao longo do tempo, en la Asociación Évame- Oroza, afondando nas súas posibilidades estéticas e simbólicas. A obra, cargada de significados persoais e sociais, actúa como ponte entre séculos e crenzas, nun diálogo constante entre o íntimo e o colectivo.

Con títulos suxerentes como Relicarios da Materia, Espiñazos, Alimento do Esquecemento, O Olor do Tempo, Xardín do Mal, Baleirando o Edén, O Bonito Futuro que Seremos e Gretas da Memoria, a autora propón unha viaxe plástica e filosófica pola identidade, a memoria e a condición humana. A serie conxuga o seu eu feminino e introspectivo coa crítica social do século XXI, deténdose nas tensións entre o corpo, o tempo e o sistema de valores contemporáneo.

Partindo de sentenzas atribuídas a Alexandre Magno, sobre a morte sen riquezas e a igualdade ante o final, a obra reflexiona sobre o consumismo feroz, a cobiza, a síndrome de Dióxenes ou a sacralización do corpo —especialmente o feminino—, fronte a un mundo espiritual case desaparecido. Nunha sorte de paralelismo descontextualizado entre a Idade Media e a Contemporánea, a artista compara o culto aos relicarios e á materia morta co culto actual ao corpo e á beleza efémera.

A través da osamenta como metáfora da impermanencia, Vértebras denuncia a caducidade dos valores materiais e propón un canto contemporáneo á memoria, á identidade e á pegada que deixamos. Cada peza pode ser colocada de múltiples formas, pois nada é estático, nada duradeiro, nada inamovible. A obra convida a mirar cara dentro, e tamén cara atrás, coa conciencia de que, ante a morte, as posesións carecen de significado. Así, a artista constrúe un carpe diem visual que busca a verdade nas gretas da memoria e na beleza do que desaparece.