O Vello Cárcere acolle unha visita guiada á exposición 'Paseando cariñosas alimañas' de Paco Pestana
O Vello Cárcere acolle este sábado unha visita guiada á exposición “Paseando cariñosas alimañas”, un percorrido íntimo pola obra e o universo creativo do artista Paco Pestana.
O vindeiro sábado 29 de novembro ás 12:30 horas terá lugar unha visita guiada á exposición “Paseando cariñosas alimañas. Paco Pestana”, unha mostra organizada pola Área de Cultura, Turismo e Promoción da Lingua do Concello de Lugo e instalada no espazo cultural O Vello Cárcere, onde poderá visitarse ata o 31 de xaneiro de 2026.
A exposición inaugurouse o pasado venres 24 de outubro, nun acto presentado pola concelleira de Cultura Maite Ferreiro e que reuniu arredor de 180 persoas, unha acollida que confirma o interese que segue xerando a figura e a obra de Paco Pestana, un dos artistas fundamentais da plástica galega contemporánea.
Un proxecto que revisa a esencia creativa de Pestana
“Paseando cariñosas alimañas” propón unha aproximación íntima ao universo artístico de Paco Pestana, a través dunha selección de pezas procedentes do seu taller, o espazo onde o creador desenvolvía o seu proceso vital e creativo. A mostra, concibida como un proxecto multidisciplinar, reúne esculturas, debuxos e poesía, permitindo coñecer de primeira man a amplitude e coherencia dunha traxectoria que marcou a segunda metade do século XX en Galicia.
Nado en Castroverde, Pestana atopou no rural a súa principal fonte de inspiración. Viaxeiro incansable por Madrid, Barcelona, Andalucía, Portugal e boa parte de Europa, instalouse definitivamente en Lugo nos anos 70, dedicándose en exclusiva á creación artística. A madeira, a natureza e o imaxinario identitario galego foron as materias coas que construíu unha obra singular, analizada por numerosos críticos e considerada exemplo de realismo máxico galego.
Un artista total cun vínculo especial con Lugo
Escultor, poeta, fabulador, showman e «filósofo da vida», como el mesmo se definía, Paco Pestana deixou en Lugo unha pegada fonda. O Vello Cárcere ten para el un significado especial: foi neste contorno onde, nos anos 70, realizou unha exposición ao aire libre que marcou o inicio da súa traxectoria pública.
O seu legado tamén está presente en distintos puntos da cidade:
-
a escultura homenaxe ao motociclista López Mella no Parque de Frigsa,
-
“Sebastián Alanceado” na Praza Roxa de Fingoi,
-
pezas no Carril dos Indios, Lamas de Prado e nos xardíns do Museo Provincial,
-
así como a súa intervención poética na Estación de Autobuses, exemplo pioneiro de arte urbana en Lugo.
Un tributo á súa memoria e á súa obra
A comisaria da exposición, que destaca a responsabilidade e a honra que supón artellar esta homenaxe na cidade das súas raíces, agradeceu a colaboración de Rita e Francisco, imprescindibles no desenvolvemento do proxecto, así como o apoio do Concello de Lugo, “polo seu compromiso coa difusión da obra de Paco Pestana na súa cidade e para a súa cidade, desde unha perspectiva de transcendencia universal”.
A exposición poderá visitarse de balde ata finais de xaneiro e a organización agarda que a visita guiada deste sábado permita ao público achegarse dun modo máis profundo ao espírito creativo dun dos artistas máis queridos e singulares de Galicia.