A Coruña prepárase para acoller unha nova edición de SINFILTRO: Hasta El Futuro Y Más Allá (HEFYMA), un evento singular que busca achegar a cidadanía ás persoas que fan posible a tecnoloxía que transforma o mundo. O vindeiro 11 de xuño, a sede de Afundación será o escenario dunha xornada que mesturará tecnoloxía, humor, cultura e emocións reais, afastándose do formato tradicional de feira ou simposio.
"Quen está detrás da tecnoloxía que transforma o mundo? Que senten, pensan e viven as persoas que a crean?" Estas son as preguntas que inspiran SINFILTRO, unha experiencia viva e accesible que na súa oitava edición contará cun cartel de luxo.
O carismático Xosé Ramón Gayoso, rostro emblemático da televisión galega, achegará o seu humor e cercanía ao evento. Tamén repetirá participación o dúo folclórico-futurista Fillas de Cassandra, que pechará a xornada cunha tertulia que promete ser divertida, crítica e emocionalmente poderosa.
Unha das novidades desta edición será a presentación do barómetro “Estado emocional do tecnólogo en España”, unha radiografía inédita do impacto humano de traballar no sector tecnolóxico na actualidade. Ademais, celebrarase unha mesa redonda con voces do mundo académico e xudicial para explorar como vivimos e regulamos o presente dixital.
"Queremos romper o mito de que a tecnoloxía é fría ou inaccesible. Detrás de cada innovación hai persoas con historias, dilemas, emocións… e moito humor”, afirman dende a organización de SINFILTRO.
Este evento consolidouse como un espazo de referencia para repensar o presente dixital, contando en edicións anteriores con personalidades como Carlos Blanco, Tomás Novas, Xosé A. Touriñán, Emma Lustres ou a alcaldesa Inés Rey.
As entradas para SINFILTRO teñen un prezo simbólico de 3€, que serán destinados integramente ao Banco de Alimentos Rías Altas a través do programa #CulturaXAlimentos de Afundación.
Unha oportunidade única para coñecer o lado máis humano da tecnoloxía.
