O Rosal fai historia en Kerkrade e acompaña a AMdOR desde a Praza do Calvario
Dous autobuses partiron rumbo a Kerkrade cargados con instrumentos, maletas, traxes e todo o material necesario para que a Agrupación Musical do Rosal (AMdOR) represente o municipio no prestixioso World Music Contest, considerado un dos certames de música para banda máis importantes do mundo.
Aínda que a actuación terá lugar a máis de 1.800 quilómetros de distancia, a formación rosaleira non estará soa. O Concello instalará unha pantalla xigante na Praza do Calvario para que veciñanza e visitantes poidan seguir en directo un dos momentos máis destacados da historia da agrupación.
A retransmisión terá lugar o sábado 1 de agosto, ás 19.00 horas, coincidindo coa actuación da AMdOR na Concert Division, a máxima categoría da competición. A banda compartirá escenario con algunhas das formacións internacionais máis destacadas do panorama musical.
A cita no Rosal pretende converterse nun grande punto de encontro para acompañar colectivamente a agrupación e vivir desde a distancia unha xornada histórica para o municipio.
Unha expedición de 125 persoas
A delegación desprazada ata os Países Baixos está formada por arredor de 125 persoas, entre músicos, integrantes da directiva, familiares e veciños que apoiarán a banda durante a súa participación no campionato.
Nesta edición, o World Music Contest de Kerkrade reúne 252 bandas de música procedentes de 31 países, consolidándose como un dos principais escaparates internacionais para as formacións musicais.
A Agrupación Musical do Rosal competirá xunto con outras doce bandas procedentes de países como Alemaña, Austria, Suíza, Portugal, Francia, Bélxica e Noruega, formando parte da elite mundial da música para banda.
Unha das últimas actuacións da xornada
A formación dirixida por Xavier Alonso Pérez será unha das últimas en actuar durante a xornada do sábado e a súa intervención precederá a sesión final do certame.
A participación en Kerkrade representa un novo fito para a historia da agrupación e unha oportunidade para proxectar internacionalmente o nome do Rosal. Mentres os músicos defendan o seu programa nos Países Baixos, a Praza do Calvario converterase no gran punto de encontro para unha veciñanza decidida a acompañalos, malia a distancia.