'Tras a pegada das musas': María Eiras (Mareiras) revindica a muller creadora na Casa do Cabido

O Consorcio de Santiago de Compostela inaugurou en días recentes de xuño a exposición "Tras a pegada das musas" na Casa do Cabido, unha mostra que exhibe as obras da artista plástica María Eiras, coñecida artisticamente como Mareiras. Na apertura, a creadora estivo acompañada pola Alcaldesa e Presidenta do Consorcio, Goretti Sanmartín Rei; o xerente do Consorcio, Xosé Antonio Domínguez; e o coordinador da exposición, Xoán Conde Roa.

A exposición é, nas palabras dos organizadores, un "camiño de recuperación e revalorización das mulleres artistas a través das obras de Mareiras". Ofrece unha alternativa para reescribir e dar un novo significado aos modelos da musa e da artista, invertendo estes roles tradicionais e reivindicando o lugar das mulleres como creadoras.

Tanto a artista como o Consorcio de Santiago convidan aos asistentes a un percorrido expositivo que explora a poderosa e singular creatividade de oito mulleres: a Condesa Oldini, Isabel Rawsthorne, Suzanne Valadon, Bella Chagall, Lidia Delectrskaya, Teresa Arijón, Celia Paul e Ethel Warwick.

Ademais, Mareiras inclúe a súa propia musa masculina, Fausto, rompendo así co discurso artístico hexemónico e reivindicando a posibilidade de que os homes encarnen o papel de musa.

Inspirada polo libro "A muller pintada" de Teresa Arijón, a intención das obras de Mareiras é revalorizar os nomes destas grandes creadoras, devolvéndolles o lugar na historia que o relato canónico lles negou.

Durante o acto de inauguración, a alcaldesa e presidenta do Consorcio de Santiago, Goretti Sanmartín, salientou a importancia desta mostra para a visibilización das mulleres creadoras, destacando a visión e o labor da artista compostelá María Eiras ao "rescatar determinadas figuras e cuestionar os cánones estéticos". Así mesmo, reivindicou as mulleres artistas que Compostela acolleu ao longo da súa historia, como Dolores Rodeiro, Elvira Santiso e María Cardaarelly, indicando que "son mulleres que son importantes e teñen unha obra importante, e o que temos que cuestionar é como estiveron representadas historicamente dende o punto de vista artístico".

María Eiras, coñecida como Mareiras, é unha artista plástica e directora de "Mareiras Espazo de Arte", situado no Preguntorio de Santiago de Compostela. Ten participado en numerosas exposicións individuais e colectivas e publicacións desde 2011. En 2024, a súa instalación "Herba de namorar" foi seleccionada na Mostra de Arte Contemporánea de Ponte de Lima (Portugal) e exposta no MUTE (Museo dos Terceiros). No mesmo ano inaugurou a súa exposición "Viriditas" nos espazos comúns do Gran Hotel Los Abetos de Compostela. En 2020 participou na mostra "Desfacendo o xénero (a través da arte)", tamén na Casa do Cabido de Santiago de Compostela.

A súa obra forma parte de coleccións destacadas como a Biblioteca Cidade da Cultura (proxecto Inside), a Fundación Eugenio de Almeida (Portugal), a Xunta de Galicia (Consellería de Política Lingüística) e diversas empresas galegas e particulares.