O Noia Harp Fest e a AEDA reivindican o talento arpístico con dúas citas de alto nivel o 1 de agosto
O Festival Internacional de Arpa Vila de Noia (Noia Harp Fest) volverá converterse este verán nun escaparate privilexiado para o talento arpístico coa colaboración da Asociación Española de Arpistas (AEDA). Ambas as entidades renovan en 2026 o seu compromiso coa promoción de intérpretes de referencia e ofrecerán o próximo 1 de agosto dúas propostas musicais que afondan na riqueza e versatilidade deste instrumento.
A primeira cita terá lugar ás 12:30 horas na Igrexa de San Francisco. O recoñecido arpista Manuel Vilas, unha das principais figuras internacionais na interpretación de arpas históricas e na recuperación do patrimonio musical, actuará xunto á formación de música antiga Entrebescant, especializada na recreación rigorosa de repertorios medievais.
Un dos elementos máis singulares deste concerto será a utilización dos instrumentos da Arquivolta da Igrexa de San Martiño. Trátase de reproducións fieis das pezas representadas no histórico pórtico, reconstruídas en 2018 grazas a unha iniciativa impulsada polo Noia Harp Fest e o Concello de Noia. O proxecto permitiu devolverlles voz aos instrumentos esculpidos na pedra mediante un minucioso traballo de investigación histórica e luthería.
A actuación de Vilas e Entrebescant ofrecerá así unha experiencia única, ao combinar a interpretación especializada coa sonoridade auténtica de instrumentos do século XV, transformando o patrimonio arquitectónico da vila en música viva.
Xa pola tarde, ás 20:00 horas, o Claustro de San Francisco acollerá o concerto da arpista Neleta Ortiz, unha das artistas máis destacadas na investigación de novos repertorios e na divulgación musical. A intérprete presentará en Noia unha obra inédita para arpa e violonchelo do compositor italiano Enrico Mainardi, resultado dun exhaustivo traballo de estudo sobre o seu legado.
A proposta contará coa participación do prestixioso violonchelista Thomas Piel e permitirá recuperar para o público unha peza de notable interese histórico e académico.
Ambos os concertos, organizados conxuntamente polo Noia Harp Fest e a AEDA, serán de acceso libre ata completar a capacidade dos espazos. A iniciativa reafirma a aposta do festival por achegar ao público propostas de gran nivel artístico e rigor musicolóxico, consolidando a súa posición como o único evento cultural do noroeste peninsular dedicado exclusivamente á arpa.