Música coral de alto nivel: O Festival 'Outono en Son' regresa a Ponteareas coa súa novena edición

A vila do Corpus prepárase para acoller unha nova edición do festival de música coral “Outono en Son”. Organizado por MISTURA VOCAL e o Concello de Ponteareas, coa colaboración da Federación Coral Galega, o evento celebrarase o vindeiro sábado, 4 de outubro, ás 20:00 horas, no Auditorio Reveriano Soutullo.

Esta novena edición chega avalada polo éxito das pasadas, que acadaron o aforo completo cun público numeroso e entregado. Nesta ocasión, máis de 150 cantores e cantoras sumarán esforzos para ofrecer un concerto de alta calidade no corazón de Ponteareas.

Unha Xornada Activa: Obradoiro de Canto Aberto ao Público

Como xa é tradición, o festival "Outono en Son" non se limita ao concerto, senón que inclúe un obradoiro de canto común aberto ao público.

Esta actividade, dirixida polas directoras e director dos coros participantes e pola profesora de técnica vocal ponteareá Antía Otero, terá lugar o mesmo sábado en dúas sesións: de 11:00 a 13:30 h. e de 16:30 a 17:15 h. no Auditorio Reveriano Soutullo.

Os cantores dos tres coros e as persoas inscritas no obradoiro compartirán momentos de traballo musical conxunto. O resultado deste traballo será amosado como remate do concerto da tarde, permitindo ao público gozar tamén dunha participación activa.

A inscrición é totalmente de balde e pódese realizar a través do formulario online dispoñible nas redes sociais de Mistura Vocal (Instagram e Facebook), así como no código QR da cartelería do festival.

Cartel de Luxo: Coros con Traxectoria Destacada

O concerto, que comezará ás 20:00 horas, contará coa participación de tres destacadas formacións corais galegas:

• O coro anfitrión, Mistura Vocal (Ponteareas), dirixidos por Aloia Martínez.

• O coro invitado Peque Coro in crescendo, do Conservatorio Xan Viaño de Ferrol, baixo a dirección de Alexandra Pita.

• O coro Coro Gaos (A Coruña), dirixido por Fernando Briones.

As tres formacións son coñecidas pola súa traxectoria e esforzaranse por achegar a máxima calidade ás súas interpretacións, que de seguro lograrán o gozo do público asistente.