O Concello de Mos lanza un concurso de poesía co obxectivo de incentivar a creación literaria inspirada na figura e obra da destacada poeta local María Magdalena. A iniciativa busca explorar a súa vida, o seu impacto na literatura galega e na identidade do municipio, ofrecendo unha plataforma para que poetas de todas as idades e estilos expresen a súa visión sobre a autora.
O certame está aberto a participantes a partir de 12 anos, divididos en dúas categorías: Xuvenil (de 12 a 17 anos) e Adultos (de 18 anos en diante). As creacións poéticas, que poderán abordar a figura de María Magdalena desde perspectivas biográficas, simbólicas ou creativas, poderán entregarse ata o vindeiro 16 de maio.
Con este concurso, o Concello de Mos reafirma o seu compromiso coa literatura e o recoñecemento da súa tradición cultural, promovendo a poesía como unha valiosa ferramenta de expresión e memoria colectiva.
Premios para as mellores creacións
O concurso outorgará dous premios por cada categoría. Na categoría Xuvenil, o primeiro premio consistirá nun diploma acreditativo, 300,00 € en metálico e un lote de exemplares das obras de María Magdalena. O segundo premio será un diploma, 200,00 € e o mesmo lote de libros.
Na categoría Adultos, os premios serán idénticos: 300,00 € en metálico, diploma e lote de libros para o primeiro posto, e 200,00 €, diploma e lote de libros para o segundo.
Como participar no certame
As persoas interesadas en participar deberán presentar un único poema, cunha extensión máxima de 20 versos. As obras poderán entregarse de dúas maneiras:
- Formato dixital: Nun único arquivo de dúas páxinas en formato Arial, tamaño 12, enviado á dirección de correo electrónico biblio_municipal@concellomos.es. O nome do ficheiro será o título do poema. A primeira páxina incluirá o título, o poema, o pseudónimo e a categoría. A segunda páxina conterá o título, o pseudónimo, o nome e apelidos reais, DNI, dirección completa, número de teléfono e correo electrónico do autor.
- Formato físico: Nun sobre pechado co título do poema escrito no exterior. No interior haberá dúas páxinas. A primeira conterá o título, o poema, o pseudónimo e a categoría.
Un xurado composto pola Concelleira de Cultura, representantes dos grupos políticos municipais, dous poetas mosenses, un representante do Departamento de Literatura Galega dun centro educativo de Mos e un funcionario do Concello actuará como secretario, será o encargado de avaliar as obras presentadas.
Normas importantes para os participantes
Cada participante só poderá presentar un poema. Está prohibido o uso de ferramentas de intelixencia artificial para a redacción dos poemas, xa sexa total ou parcialmente. As obras presentadas non deben ter sido publicadas previamente en ningún formato, nin estar pendentes de veredicto noutros concursos ou procesos editoriais.
Os participantes conservarán os dereitos de propiedade intelectual dos seus poemas, pero aceptarán que a Concellería de Cultura do Concello de Mos poida utilizalos para a súa difusión e publicación, así como para a súa corrección gramatical e léxica.
