A 'maxia especial' de Pontevedra capturada en fotografías nun novo libro da Deputación

A Deputación de Pontevedra presentou o volume "Pontevedra en fotografías", unha colección de máis de 200 imaxes do fotógrafo Luís Pereiro que inaugura unha nova iniciativa da institución provincial para destacar o talento fotográfico local. O acto de presentación tivo lugar no Arquivo Provincial e contou coa presenza de Rafa Domínguez, quen eloxiou a capacidade de Pereiro para "captar esta cidade que apela ao máis esencial de nós" e "compartilo con nós".

O libro, coordinado por Antón Sobral, ofrece, segundo o vicepresidente, "imaxes que falan por si soas". A publicación recolle unha selección de fotografías que plasman unha poética visual marcada pola experiencia emocional do autor, onde a luz e as súas variacións ao longo do tempo xogan un papel protagonista. As imaxes incluídas abarcan desde paisaxes e monumentos ata celebracións populares como o Entroido, a Semana Santa e a Feira Franca, sen esquecer detalles do día a día, todas elas caracterizadas pola súa alta calidade técnica e localizadas tanto no casco histórico e urbano de Pontevedra como nas súas parroquias.

Luís Pereiro, natural de Palas de Rei (Lugo) e residente en Pontevedra durante máis de trinta anos, onde foi docente de Lingua Galega no IES Luis Seoane de Monte Porreiro ata a súa xubilación en 2019, é un fotógrafo afeccionado cuxas instantáneas da cidade xa foran expostas no Palacete das Mendoza.

Ademais de distribuírse entre os asistentes á presentación, a Deputación de Pontevedra fará chegar exemplares de "Pontevedra en fotografías" ás bibliotecas públicas e puntos de lectura de toda a provincia.