Historia dunha bicicleta, Ya Hanouni e Memoria de Soutelo triunfan no palmarés da cuarta edición do Facom Fest
Os filmes Historia dunha bicicleta, de Xoán Fernández Diz; Ya Hanouni, de Lyna Tadount e Sofian Chouaib; e o documental Memoria de Soutelo, de Xoán Bregua, foron os grandes gañadores da cuarta edición do Facom Fest, que puxo este luns o broche final coa gala de entrega de premios.
O festival, organizado por estudantes da USC, recoñeceu así o mellor talento emerxente entre as 35 curtametraxes exhibidas nesta edición, celebrada entre o 24 e o 27 de novembro na Facultade de Ciencias da Comunicación.
Premio da Sección Galega: Historia dunha bicicleta
Na Sección Galega, o xurado —formado polo realizador Pablo Fontenla, a investigadora Valeria Gómez e a alumna da USC Laura Valeiras— escolleu Historia dunha bicicleta, de Xoán Fernández Diz, como mellor peza.
Rodada en Cangas do Morrazo, a curtametraxe destaca pola súa sinxeleza visual e pola sensibilidade coa que aborda a historia dunha moza que recupera a súa bicicleta para buscar un momento de calma xunto ao mar.
O galardón inclúe 300 euros e un asesoramento de distribución ofrecido por La Machina.
Premio da Sección Internacional: Ya Hanouni
O xurado internacional —composto pola directora de fotografía Alicia Francés, o crítico Alberto Abuín e a estudante Evs García— premiou Ya Hanouni, realizado polos estudantes da Université Paris 1 Lyna Tadount e Sofian Chouaib.
O tribunal destacou “a dirección precisa, a capacidade para xerar emoción e tensión en poucos minutos e unha notable síntese cinematográfica”. O premio está dotado con 200 euros.
Premio do Público: Memoria de Soutelo
O público das proxeccións outorgou o seu premio ao documental Memoria de Soutelo, de Xoán Bregua, centrado no diálogo visual entre o Soutelo de Montes fotografado por Virxilio Viéitez e o Soutelo actual captado por Candela Lorenzo, produtora do filme.
Un festival que une formación e profesionalización
Ademais das proxeccións, o Facom Fest completou a súa programación con encontros profesionais que achegaron ao alumnado creadoras e creadores como Álvaro Gago, Paula Cons, Berta Dávila ou Brais Lorenzo, reforzando a súa vocación de ponte entre o ámbito educativo e o sector audiovisual.
O palmarés completo, incluíndo a mención do festival XOCIVIGA e os recoñecementos por categorías, adxúntase a continuación.