'Galicia a un paso de ti', en Lugo

A Sede Afundación Lugo acollerá a partir de mañá, martes 7 de setembro, ás 11.00 h, a exposición «Galicia a un paso de ti», un proxecto fotográfico promovido por Turismo de Galicia en colaboración coa Obra Social de ABANCA. Na rolda de prensa de presentación estarán Javier Arias Fouz, delegado da Xunta de Galicia en Lugo; Adolfo Enríquez, fotógrafo autor das imaxes da mostra; e Carmen Pérez Larrán, responsable da Área Educativa de Afundación. A mostra poderá visitarse, ata o 16 de outubro, en horario de luns a sábado de 17.30 a 20.30 h.

«Galicia a un paso de ti», producida por Turismo de Galicia, é unha exaltación do territorio galego e o seu extraordinario poder de atracción, da súa natureza e patrimonio histórico, a través das instantáneas do fotógrafo Adolfo Enríquez. As circunstancias excepcionais provocadas polo impacto da COVID-19, que limitaron os desprazamentos, serviron tamén para que en Galicia, como en cada recanto do planeta, os seus habitantes se detiveran a observar o que teñen máis preto, a valoralo e a reflexionar sobre a importancia de preservalo.