A 18ª edición do Festival de Cinema de Bueu, que se celebra do 5 ao 20 de setembro, inaugurarase cunha proxección especial da película Romería, o novo traballo da recoñecida directora Carla Simón. O filme, que acaba de estrearse no Festival de Cannes, exhibirase o venres 5 de setembro ás 20:30h, coincidindo coa súa chegada aos cines de toda España.
A proxección contará coa presenza de dous dos actores do filme, o ferrolán Alberto Gracia e a viguesa Marina Troncoso, converténdose nun dos poucos eventos de estrea en España coa participación do elenco.
Romería narra a historia de Marina (Llúcia Garcia), unha moza adoptada que viaxa a Vigo para coñecer á familia do seu pai biolóxico. A súa chegada destapa un pasado silenciado, levándoa a descubrir as feridas familiares a través do diario da súa nai e da conexión co seu curmán. A película afonda nos vínculos familiares e na memoria dunha xeración marcada pola transición democrática dos anos 80, a crise da heroína e a SIDA.
Xornadas cinematográficas sobre música e cinema
Ademais da proxección, o festival acollerá durante a súa primeira fin de semana unhas Xornadas Cinematográficas centradas na relación entre a música e o cinema. Nesta ocasión, participarán a montadora do filme, Ana Pfaff, e o compositor, Ernest Pipó, para reflexionar sobre a súa colaboración en Romería.
Ambos profesionais abordarán a importancia da edición e a composición musical para marcar o ritmo dun filme. Ana Pfaff, montadora de recoñecido cinema independente e gañadora de dous Premios Gaudí, e Ernest Pipó, compositor con traballos previos con Carla Simón, compartirán as súas experiencias nun encontro moderado por Gaspar Broullón.
Esta iniciativa forma parte da aposta central do festival pola relación entre música e cinema, sobre a cal se desvelarán máis actividades nas vindeiras semanas.
