O xornalista e escritor Félix Caballero estréase na literatura infantoxuvenil con O tesouro do Casqueiriño, editado por Galaxia no seu selo Árbore, con ilustracións de Evaristo Pereira.
Trátase dun relato para nenos de máis de dez anos inspirado nun dos afillados do autor. A acción transcorre toda na parroquia ribeirense de Palmeira e nos seus arredores. A procura dun tesouro agochado polos mouros hai milleiros de anos no Casqueiriño, un pequeno penedo fronte á praia do Baluarte, levará un feixe de rapaces a descubriren a historia e a paisaxe da zona e, sobre todo, o valor da amizade. Guiados por O Ciprianillo, un vello libro atopado por un deles na casa de aldea dos seus avós e que os labregos tiñan por máxico noutro tempo, explorarán algúns dos lugares máis misteriosos da contorna, como a Congostra da Carballa, a Pedra das Cabras –cos seus singulares petróglifos–, a Pedra da Ra e o Castro da Cidade.
Caballero é doutor en comunicación e tense especializado no estudo do humor, tema sobre o que ten escrito a maioría a súa obra. O seu último libro era A retranca. Un intento de clarificación (Galaxia, 2022), en que intenta debullar as características deste concepto e diferencialo doutros máis ou menos achegados.
