A Xunta de Galicia e a Federación de Librarías de Galicia impulsan a Feira do Libro de Viveiro, a undécima parada do ciclo de feiras que percorre 13 localidades galegas. O evento celebrarase nos xardíns de Noriega Varela ata o mércores 15 de agosto.
Baixo o lema "Onde florecen os libros", a feira inaugurouse coa lectura dos pregóns a cargo da escritora Lucía C. Peña e de Inés Ben Oroso, no caso do pregón infantil. Durante estes días, o público poderá gozar dunha ampla programación que inclúe máis de 40 actividades culturais, como presentacións, sinaturas de libros, obradoiros, conversas e sesións de teatro infantís.
A feira contará coa participación de 9 librarías e editoriais, ademais de máis de unha vintena de autores. O horario de apertura é de 12:00 a 14:00 horas e de 18:00 a 22:00 horas.
A cita de Viveiro enmárcase na campaña de verán "Para gustos, cultura", unha iniciativa da Xunta de Galicia que ofrece unha programación cultural diversa e de calidade en máis de 200 concellos galegos.
Tras a parada en Viveiro, o ciclo de feiras continuará en Foz (do 16 ao 19 de agosto) e rematará en Monforte de Lemos (do 20 ao 23 de agosto).
