A Federación de Ateneos de Galicia, unha salientable entidade cultural e cidadá integrada polos Ateneos de Santiago, Ferrol, Vigo, Pontevedra, Ourense, Marín e Moaña, sumouse á denuncia realizada por varias asociacións memorialistas e culturais. A Comisión pola Recuperación da Memoria Histórica da Coruña (CRMH da Coruña), a AC Alexandre Bóveda da Coruña, a AC Eira Vella de Betanzos e a AC Irmáns Suárez Picallo de Sada alertaron sobre a paralización do procedemento para declarar Ben de Interese Cultural (BIC) o Museo Carlos Maside de Sada.
A Federación lembra que hai quince anos o Parlamento de Galicia acordou iniciar este proceso de declaración BIC. Con todo, non se realizou ningunha acción efectiva ata o pasado ano 2023, coa Resolución do 1 de agosto da Dirección Xeral de Patrimonio Cultural da Xunta de Galicia, que incoaba o procedemento. Agora, a preocupación radica en que este expediente está a piques de caducar se non se emite unha resolución expresa antes de que transcorran 24 meses desde a súa publicación.
Ante esta situación, a Federación de Ateneos de Galicia, xunto coas asociacións denunciantes, esixe á Xunta de Galicia que resolva de xeito urxente este expediente en defensa do interese xeral. Así mesmo, instan o goberno autonómico a adoptar as medidas necesarias para recuperar este proxecto museográfico de incalculable valor, concibido por Luís Seoane e Isaac Díaz Pardo en plena ditadura franquista, e que representa un patrimonio cultural fundamental para Galicia.
