A Deputación de Pontevedra participará na feira Culturgal, que se celebra no Pazo da Cultura entre o 28 e o 30 de novembro, cunha intensa programación de actividades arredor do lema “Unha provincia para cantar a cultura”. O obxectivo é poñer en valor os programas e iniciativas impulsadas ao longo do ano pola institución provincial para achegar tanto a música profesional como a amateur, así como as tradicións culturais, a todas as xeracións.
Durante toda a fin de semana, o posto da Deputación e os distintos espazos da feira acollerán concertos, obradoiros, presentacións de libros e proxectos documentais, ademais dunha xornada profesional destinada ao sector musical de Galicia e do norte de Portugal.
Programación do sábado: música e obradoiros
As actividades comezarán o sábado 29 ás 12:30 horas cun concerto das pandeireteiras Soalleira de Dorrón, seguido dun obradoiro aberto deste instrumento tradicional.
Pola tarde, ás 18:30 horas, está previsto un concerto do Óscar Ibáñez Quartet, formado por Óscar Ibáñez (frauta e gaita), Fernando Fraga (acordeón), Xosé Liz (bouzouki) e Leandro Deltell (caixón e caixa).
Para pechar a xornada, ás 19:30 horas ofrecerase un concerto didáctico sobre a nova técnica de pandeireta galega, a cargo de Suso Vaamonde. Todas estas actividades celebraranse no posto da Deputación de Pontevedra.
Un domingo con programación intensa
O domingo 30 será o día de maior actividade. Ás 12:00 horas, no Teatriño, presentarase o proxecto documental “Mozas da miña aldea. As cantareiras e a poesía popular oral na provincia de Pontevedra”, nun acto no que participará o deputado de Cultura, Jorge Cubela, e que rematará coa actuación das pandeireteiras de Toutón.
Estas artistas trasladaranse despois, ás 12:45 horas, ao posto da Deputación para ofrecer unha segunda actuación.
Ás 13:00 horas, tamén no posto provincial, terá lugar un obradoiro aberto de pandeiro redondo e pandeireta, impartido por María Vidal Solla e Pichi Abollado.
Xa pola tarde, ás 17:00 horas no Escenario Arte, presentarase o libro de banda deseñada “Castelao en Pontevedra (1916-1936)”, de Miguel Pérez Ramudo, nun acto organizado polo Museo de Pontevedra.
Finalmente, ás 17:30 horas, a Fundación Legar ofrecerá no posto da Deputación un concerto didáctico sobre instrumentos de raíz.
Xornadas profesionais MUMI
A Deputación tamén colabora un ano máis nas Xornadas Profesionais MUMI: Músicas no Minho, que terán lugar o venres 28 na Sala VIP do Pazo da Cultura. A programación inclúe conferencias e mesas redondas sobre temas como a lingua como motor cultural, o papel transformador dos festivais e outros retos actuais do mercado musical.
Material promocional e iniciativas culturais
No posto da Deputación estará dispoñible material promocional dos programas vinculados ao lema “Unha provincia para cantar a cultura”. Entre eles destacan:
-
Culturea e +Música
-
Os circuítos Son Verán e Entradiñas de Aninovo
-
Os obradoiros escolares Instrumentos da Memoria
-
O concurso Canta Rosalía!
-
As liñas de axudas para festivais e agrupacións musicais
As persoas visitantes tamén poderán levar bolsas de tea e pulseiras co lema da campaña.
