A Deputación de Pontevedra colabora este ano na recuperación do tradicional memorial dedicado a Ricardo Portela, unha das figuras máis influentes da música tradicional galega. A iniciativa desenvólvese da man do Concello de Cerdedo-Cotobade, a agrupación Os Abrentes de Cerdedo e a Asociación de Gaiteiros Galegos (AGG). As Xornadas de Homenaxe a Ricardo Portela celebraranse mañá sábado, 29 de novembro, en Viascón e Cerdedo, tras un ano de ausencia.
As actividades arrancarán pola mañá na Casa da Gaita de Viascón, coordinadas pola AGG cun programa centrado no toque pechado, estilo do que Portela foi un dos grandes referentes. A xornada abrirá ás 10:30 horas coa charla-concerto “O toque pechado na Península Ibérica”, impartida por Pablo Carpinteiro. Seguiralle a mesa redonda “Achega ao estilo interpretativo do toque pechado de Ricardo Portela”, con Miguel Fraguas e Juan Iglesias, e pecharase cun obradoiro de iniciación ao toque pechado, tamén dirixido por Miguel Fraguas e dividido en dúas sesións antes e despois do xantar.
Pola tarde, a partir das 20:00 horas, o Centro Cultural de Cerdedo acollerá o Festival Tradicional de Homenaxe a Ricardo Portela, coordinado polos Abrentes de Cerdedo e presentado por Malores Villanueva. No evento participarán todas as agrupacións musicais tradicionais da vila. A programación continuará cunha cena popular no local multiúsos situado a carón do pavillón municipal e cun serán aberto, que comezará ás 23:30 horas. Nas actividades nocturnas colaboran tamén a Comisión de Festas Divino Ecce Homo de Cerdedo e o Cerdedo-Cotobade Fútbol Sala.
Este festival forma parte das accións coas que a Deputación rende homenaxe a Ricardo Portela, figura imprescindible na conexión entre a tradición dos vellos gaiteiros e as novas xeracións. Recentemente, a institución provincial organizou tamén a exposición “Ricardo Portela, inmorrente”, creada para difundir a súa vida e obra e poñer en valor os seus fitos máis destacados, que seguen a ser unha referencia para a mocidade.
O gaiteiro de Viascón é unha peza clave da música tradicional galega e un innovador no eido da gaita, que soubo crear escola e transmitir recursos propios dun estilo que continúa vivo no toque dalgúns dos gaiteiros e gaiteiras máis recoñecidos da actualidade.
