A Federación de Ateneos de Galicia, entidade que agrupa diversas asociacións culturais galegas, celebrou o pasado xoves, día 15 de maio, unha nova xuntanza na cidade de Santiago de Compostela, que contou coa presenza de representantes dos Ateneos de Santiago, Vigo, Pontevedra, Ferrol, Ourense e Moaña. O representante do Ateneo de Marín, tamén integrante da Federación, escusou a súa presenza por motivos de axenda.
Durante a xuntanza concretáronse os detalles dunha homenaxe a Castelao, en conmemoración do Ano Castelao, que se realizará en Rianxo o vindeiro 14 de xuño. A xornada iniciarase cunha recepción por parte do Alcalde desta localidade aos directivos dos ateneos federados. O acto contará, ademais, cunha visita guiada polo Rianxo de Castelao, unha ofrenda floral na escultura de Castelao, o recital poético «Castelao sempre» por parte de poetas galegos (Helena Villar Janeiro, Xesús Rábade Paredes, Xaime Toxo, Xabier Paz e Luísa Abad, entre outros) e un xantar de confraternidade dos ateneístas. A homenaxe finalizará cunha foliada dun conxunto galego e un grupo de cantareiras, clausurándose cun cántico final colectivo da Rianxeira.
Outro dos puntos tratados foi o ciclo de conferencias «Rompendo as barreiras do localismo», unha iniciativa que pretende reivindicar unhas cidades dende outras, fomentando as boas relacións entre elas mediante o recoñecemento da singularidade de cada unha e desbotando a competencia dos localismos. O ciclo inaugurarase o vindeiro 26 de maio nos Luns do Ateneo coa conferencia «Vigo en Santiago», impartida polo escritor e editor vigués Manuel Bragado, e continuará o 28 de maio con «Santiago en Pontevedra», impartida polo ex-Alcalde de Santiago, Xerardo Estévez; o 3 de xuño con «Ourense en Vigo», impartida polo escritor ourensán Bieito Iglesias; e o 6 de xuño con «Ferrol en Ourense», impartida polo historiador ferrolán Guillermo Llorca.
A Federación de Ateneos de Galicia volverá reunirse na segunda quincena de setembro na cidade de Ourense para concretar outras propostas de actividades presentadas nesta xuntanza.
