A Xunta activa a alerta de nivel 1 por calor no sur de Pontevedra ante a chegada dunha masa de aire quente

A Xunta de Galicia, a través do seu Plan de Actuacións fronte ás altas temperaturas, activou a alerta de nivel 1 por calor nas zonas isoclimáticas do Litoral e do Miño, no sur da provincia de Pontevedra. Esta medida débese á chegada inminente dunha masa de aire quente de orixe norteafricana que disparará os termómetros nos próximos días.

Segundo as previsións de MeteoGalicia, a situación de altas temperaturas que hoxe afecta a puntos do sur, tenderá a xeneralizarse a partir de mañá domingo. As máximas poderían moverse entre os 35ºC e os 40ºC en moitos puntos de Galicia, co norte de Lugo e o norte da Coruña como as únicas zonas que se librarán desta vaga de calor. Ademais, en áreas de Pontevedra prevese a chegada das primeiras noites tropicais, mentres que no interior as madrugadas serán máis frescas.

O episodio de calor prolongarase polo menos ata o mércores da próxima semana, e podería estenderse nalgunhas zonas ata o xoves. Ante esta situación, a Consellería de Sanidade lanzou unha serie de recomendacións para a poboación, dirixidas especialmente aos colectivos máis vulnerables como os maiores de 65 anos, nenos pequenos e persoas con patoloxías crónicas.

As recomendacións inclúen:

• Beber máis líquidos, sobre todo auga e zumes, e evitar bebidas alcohólicas, con cafeína ou moi azucradas.

• Aumentar o consumo de froitas, verduras e ensaladas.

• Evitar as comidas copiosas e facer máis comidas, pero menos abundantes.

• Usar roupa lixeira, folgada, de cores claras e protexerse do sol con sombreiros e lentes.

• Manterse en lugares frescos e á sombra, e ventilar as vivendas pola noite.

• Evitar as actividades ao aire libre e o exercicio físico nas horas de máis calor.

• Nunca deixar a nenos, anciáns ou mascotas dentro de coches estacionados coas fiestras pechadas.

En caso de esgotamento ou golpe de calor, a Xunta insta a solicitar axuda médica urxente chamando ao 061. Mentres chega a asistencia, aconséllase trasladar a persoa afectada a un lugar fresco, arrefriarlle o corpo e hidratala con pequenos tragos de auga se está consciente. Se está inconsciente, debe deixarse deitado de lado coas pernas flexionadas e sen ofrecerlle líquidos.

A información actualizada sobre a evolución da alerta por calor pode consultarse na web de MeteoGalicia, e o Plan de Actuacións está dispoñible na web do Sergas.