Un ano máis, O Porriño vístese de Nadal cunha proposta pensada para favorecer a conciliación da vida laboral e familiar das familias do municipio. A través da Concellería de Igualdade, o Concello pon en marcha o campamento “Anímate e vén a xogar connosco”, un espazo seguro no que os nenos e nenas poderán desfrutar destas datas tan especiais mediante o xogo e actividades orientadas a fomentar valores como a cooperación, o respecto, a empatía e a solidariedade.
O campamento desenvolverase os días 22, 23, 26, 29 e 30 de decembro, e 2, 5 e 7 de xaneiro, en horario de 08.30 a 14.30 horas, en instalacións municipais. O CEIP Xosé Fernández López será o punto de entrega e recollida das crianzas.
A actividade está dirixida a nenos e nenas de 3 a 12 anos, cun límite máximo de 50 prazas, que estarán reservadas preferentemente para menores empadroados no Porriño.
Inscricións do 1 ao 8 de decembro
O prazo de inscrición abrirase o luns 1 de decembro ás 09.00 horas e pecharase o día 8 á mesma hora. As familias interesadas deberán cubrir o modelo oficial de solicitude, dispoñible na páxina web do Concello ou no Rexistro municipal, e presentalo xunto coa documentación requirida tanto de forma presencial como a través da sede electrónica.
As prazas asignaranse por orde rigoroso de inscrición.
