O Porriño abre o prazo para solicitar as axudas do Plan Provincia Comunitaria 2026, con subvencións de ata 10.000 euros por entidade

O Concello do Porriño informou ás asociacións veciñais e entidades sociais do municipio da apertura do prazo para solicitar as subvencións do Plan Provincia Comunitaria 2026, unha liña de axudas da Deputación de Pontevedra destinada a financiar investimentos que melloren infraestruturas, equipamentos e locais sociais das entidades.

O prazo de presentación xa está aberto e remata o 1 de abril de 2026, polo que desde o Concello recoméndase ás entidades interesadas iniciar canto antes a preparación da documentación necesaria.

As subvencións poderán cubrir ata o 100% do investimento, cun importe mínimo de 6.000 euros e un máximo de 10.000 euros por entidade beneficiaria, o que permite acometer actuacións sen necesidade de achega económica propia.

A convocatoria está dirixida a asociacións de veciños, federacións, confederacións ou unións veciñais, así como a asociacións de mulleres rurais, sempre que estean legalmente constituídas e inscritas no Rexistro de Asociacións da Comunidade Autónoma de Galicia.

Investimentos subvencionables

As axudas destínanse exclusivamente a investimentos, incluíndo:

• Obras de mellora de locais sociais e creación ou mellora de infraestruturas e espazos para a actividade da entidade.

• Adquisición de mobiliario e equipamento informático, audiovisual ou específico para o desenvolvemento das actividades.

• Determinados gastos vinculados á tramitación, taxas e licenzas necesarias, así como traballos previos de desbroce ou limpeza cando formen parte dunha obra.

As actuacións deberán realizarse integramente na provincia de Pontevedra e será requisito indispensable que a entidade solicitante sexa titular ou dispoña dun dereito de uso mínimo de cinco anos sobre os inmobles ou terreos nos que se executen os investimentos.

Chamamento ás entidades

O alcalde do Porriño, Alejandro Lorenzo, destacou a importancia desta convocatoria para o tecido asociativo local e animou ás entidades a presentaren as solicitudes. “Estas axudas son unha oportunidade moi importante para que as asociacións poidan mellorar os seus locais, renovar equipamentos e poñer en marcha investimentos que repercuten directamente na calidade de vida da veciñanza”, sinalou.

Lorenzo subliñou tamén o papel das asociacións no ámbito social e comunitario do Porriño, parroquias e barrios, e insistiu na necesidade de difundir esta liña de subvencións para que chegue ao maior número posible de colectivos.

Cada entidade poderá presentar unha única solicitude, que deberá tramitarse exclusivamente por vía electrónica, achegando o acordo do órgano competente e a documentación recollida nas bases, incluíndo memoria ou proxecto técnico cando sexa preciso.

A data límite para presentar solicitudes é o 1 de abril de 2026.