Ponteareas presenta a nova Exposición da Camelia, un evento que fusiona natureza, arte floral e patrimonio botánico

O Concello de Ponteareas deu a coñecer hoxe, na sede da Deputación de Pontevedra en Vigo, a nova edición da súa Exposición da Camelia, unha cita que converterá de novo a vila nun punto de encontro para amantes da natureza, da arte floral e do patrimonio botánico. A programación desenvolverase os días 28 de novembro, 4, 6 e 7 de decembro de 2025, entre a Casa do Concello e a Praza da Música, e inclúe un amplo abano de actividades culturais, divulgativas e participativas.

Durante a presentación, a vicepresidenta da Deputación destacou o compromiso da alcaldesa de Ponteareas coa posta en valor da camelia e o papel fundamental de Galicia no seu cultivo. Subliñou tamén o éxito de proxectos como a Ruta das Camelias, que integra coñecemento científico, promoción turística e valorización de produtos derivados, como o aceite ou o té de camelia.

“A camelia é cultura, identidade e futuro”, afirma a alcaldesa Nava Castro

A alcaldesa, Nava Castro, puxo o foco no vínculo histórico e artístico que mantén Ponteareas coa expresión floral:
“Somos terra de alfombras feitas con pétalos e elementos vexetais. Ese legado ensinounos que a arte pode atraer milleiros de visitantes, e a camelia comparte esa mesma capacidade”.

Castro definiu a camelia como un recurso estratéxico, tanto cultural como turístico e botánico:
“Coñecer un cultivo é comprender un territorio. Esta exposición é un espazo de beleza, pero tamén de aprendizaxe, investigación e posta en valor”.

A rexedora destacou ademais a proxección internacional acadada pola Deputación ao presentar esta “Flor de Galicia” no Camelliae International Congress celebrado en Tokio, reforzando o seu prestixio no eido internacional.

Un evento recuperado e reforzado polo Concello

O tenente de alcaldesa, Juan Carlos González Carrera, salientou a aposta do goberno local por recuperar unha exposición que “estivo anos abandonada” e que agora regresa con forza:
“Queremos que Ponteareas sexa o punto de encontro para amantes da natureza e da arte floral que representa esta flor tan especial”.

González Carrera presentou tamén a programación completa, con inauguracións, obradoiros, catas de té, música en directo, charlas divulgativas e a apertura continuada da mostra ao longo da fin de semana.

Agradeceu ademais o traballo das persoas e entidades colaboradoras, cun recoñecemento especial para Antonio e Carmen Salinero, presidenta da Sociedade Española da Camelia.

“As exposicións son vitais para preservar a especie”

A presidenta da Sociedade Española da Camelia, Carmen Salinero, destacou que estes eventos son fundamentais para fomentar o cultivo, espertar interese e difundir o valor da camelia:
“Grazas ao traballo continuo de institucións, produtores e afeccionados, Galicia é hoxe un referente internacional”.

PROGRAMACIÓN OFICIAL

Venres, 28 de novembro

• 12:00 h – Inauguración da exposición “A Camelia, flor de galegas e galegos” na Praza da Música.

• Charla-cata do té da Camelia.

Xoves, 4 de decembro

• 17:30 h – Entrega de premios do Concurso de Relatos Ilustrados da Camelia (Sala Multiúsos, Auditorio Reveriano Soutullo).

Sábado, 6 de decembro

• 13:00 h – Inauguración oficial da exposición na Casa do Concello, con actuación dun grupo de pandereteiras.

• 16:30–20:00 h – Apertura ao público da exposición.

• 16:30 h – Charla-cata do té da Camelia (Auditorio Reveriano Soutullo).

• 17:30 h – Obradoiro sobre a Camelia (Casa do Concello).

Domingo, 7 de decembro

• 10:30–13:30 h – Apertura da exposición.

• 16:30–20:00 h – Apertura da exposición e clausura.

• 17:00 h – Actuación da Rondalla da Asociación Recreativa Santa Eulalia de Atios.