Nigrán retoma as plantacións comunitarias no futuro parque forestal Os Matos-Río Táboas con escolares e usuarios do CEE Juan María
O Concello de Nigrán retomou esta semana as plantacións comunitarias no futuro parque forestal Os Matos–Río Táboas, implicando a usuarios do CEE Juan María e ao alumnado do CEIP da Cruz (Camos) nunha actividade que combina reforestación e concienciación ambiental.
Unha ducia de usuarios do centro ocupacional participaron na plantación de 60 oliveiras doadas por un particular nunha parcela de media hectárea situada na parroquia de Camos. Pola súa banda, o alumnado de 2º a 6º de Primaria do CEIP da Cruz encargouse de reforestar outra parcela próxima de unha hectárea, onde plantaron 200 cerdeiras e castiñeiros.
O alcalde de Nigrán, Juan González, acompañado pola concelleira de Educación, Estela Pérez, participou na xornada, dirixida pola Brigada Forestal Municipal e por axentes medioambientais da Xunta de Galicia, que acudiron equipados cunha motobomba para facilitar o rego das novas plantacións.
“A colaboración da cidadanía, especialmente dos máis pequenos, é fundamental para garantir o futuro do parque forestal, xa que crea un vínculo emocional que os converte nos mellores embaixadores do mesmo”, destacou o rexedor.
Un parque forestal de 42 hectáreas
O parque forestal Os Matos–Río Táboas será o primeiro destas características na comarca e situarase no monte comunal das parroquias de Camos e Chandebrito, nunha superficie de 42 hectáreas que quedaron completamente calcinadas nos incendios de 2017.
Do total do terreo, 30 hectáreas pertencen á Comunidade de Montes de Camos (parcelas de Castelo e As Chans) e 12 á de Chandebrito (As Rozadas). O proxecto busca crear un espazo natural público de recreo, con valores ambientais, culturais e paisaxísticos, que ademais actúe como protección para os núcleos de poboación máis próximos.
Recuperación ambiental e posta en valor do patrimonio
A transformación do espazo inclúe a eliminación de especies invasoras, a plantación de frondosas autóctonas e, nunha segunda fase, a creación de novos espazos públicos e a recuperación do patrimonio histórico e etnográfico.
Na parte central do parque, nunha superficie de 6,5 hectáreas, está prevista a creación dun arboreto representativo dos bosques galegos. Ademais, en dúas zonas con abundantes afloramentos rochosos, que suman 5,7 hectáreas, plantaranse carballos autóctonos para estabilizar o terreo.
Nas valgadas naturais do extremo sur e leste, cunha extensión de 1,92 hectáreas, realizarase unha reforestación con frondosas autóctonas, reforzando así o ecosistema da fraga do río Táboas.
O proxecto contempla tamén medidas naturais de prevención contra incendios, a protección de xacementos arqueolóxicos e a posta en valor de elementos patrimoniais como muíños ou petroglifos.
Un espazo aberto á cidadanía
Entre as actuacións previstas inclúense a creación dunha área recreativa en O Serradouro e As Rozadas, a habilitación dunha zona de aparcamento, a mellora do miradoiro do Castelo e a creación dunha ruta de acceso ata este punto.
Ademais, o parque contará con paneis informativos, pictogramas e códigos QR para facilitar a interpretación do espazo e promover o coñecemento dos seus valores naturais, culturais e paisaxísticos.
Con estas actuacións, o Concello de Nigrán busca converter Os Matos–Río Táboas nun referente ambiental e social na comarca, combinando recuperación ecolóxica, uso público e educación ambiental.