Mos acende o seu Nadal máis rondalleiro cun multitudinario acto no Pazo de Mos

O Concello de Mos deu esta tarde o pistoletazo de saída ao seu Nadal máis rondalleiro cun multitudinario acto de acendido das luces que encheu o Pazo de Mos de veciños, familias e moita ilusión. A alcaldesa, Nidia Arévalo, presidiu o evento acompañada polo director xeral de Comercio e Consumo da Xunta de Galicia, Gabriel Alén, que quixo estar presente nun dos momentos máis especiais do municipio.

A xornada festiva incluíu tamén a entrega dos premios da campaña “Compra e Gaña en Mos”, celebrada pola mañá durante a apertura do Mercado Aberto do Queda en Mos III, que permanecerá en funcionamento ata mañá co obxectivo de dinamizar o comercio local e fomentar o consumo de proximidade nestas datas.

“Hoxe Mos acende non só as luces, senón un Nadal cargado de tradición, convivencia e moitísimo espírito rondalleiro”, sinalou a alcaldesa Nidia Arévalo, quen destacou a identidade propia co que o municipio vive estas festas. Tras a súa intervención, o público gozou da actuación estelar de Cantajuego co espectáculo “El Payaso Tallarín”.

Un Nadal cheo de propostas e coa mirada posta no Rondallas Fest

Co acendido, Mos activa unha programación ampla, diversa e pensada para todas as idades, que ten como evento central o Rondallas Fest, previsto para a fin de semana do 12 ao 14 de decembro no Pazo de Mos. O festival incluirá un coloquio co director e actores da película Rondallas, foodtrucks durante toda a tarde e actuacións das rondallas ás 16:30 horas ambos días, reforzando a aposta do municipio por esta tradición tan arraigada.

A actividade continuará o venres 19, ás 19:00 horas, co Multiusos das Pozas como escenario da Festa do Deporte, un acto de recoñecemento ao tecido deportivo local.

O domingo 21 chegará cargado de propostas:

• 10:30 h – Papanoelada Moteira, con saída desde a Avenida de Sanguiñeda

• 10:30 h – Concentración de Coches Clásicos no Parque O Son do Regueiro de Torroso

• 12:00 h – Festival de Nadal das Escolas de Patricia Martínez no Multiusos das Pozas

• 19:00 h – Concerto de Chavellos Sinfónico e a Banda de Música Xuvenil de Torroso no Auditorio de Torroso

O sábado 27, a partir da medianoite, o Pazo de Mos acollerá a tradicional Festa Pre Fin de Ano, que cada ano reúne a centos de persoas. E o domingo 28, ás 18:00 horas, o Auditorio de Torroso ofrecerá unha nova sesión de Ocio en Familia coa compañía Malasombra e o seu espectáculo “Os Fabulosos Cleaners”, incluído un show de pompas xigantes para público infantil e familiar.

Beléns visitables durante todo o Nadal

Durante todo o período festivo permanecerán abertos ao público os dous beléns máis emblemáticos do municipio:

• Belén do Pazo de Mos

  • De luns a domingo: 17:00–20:00

  • Sábados e domingos: 10:00–13:30 e 17:00–20:00

  • Pechado: 25 de decembro pola tarde e 1 de xaneiro todo o día

• Belén de Herville (Asociación Cultural de Herville)

  • Luns a venres: 15:00–17:00 e 19:00–22:30

  • Sábados: 15:00–23:00

  • Domingos: 11:30–13:30 e 15:00–21:30

Cabalgata de Reis para pechar as festas

O Nadal mosense culminará o luns 5 de xaneiro coa tradicional Cabalgata de Reis, que percorrerá as rúas de Sanguiñeda a partir das 18:00 horas levando ilusión e maxia aos máis pequenos.

O Concello de Mos anima toda a veciñanza a participar activamente dunha programación pensada para dinamizar o municipio, apoiar o comercio local e celebrar con orgullo as tradicións que definen a identidade da comunidade.