O Mercado de Tomiño brilla na "Primavera no Mercado" e atráe a máis de 400 persoas
O Mercado de Tomiño vestiu as súas mellores galas para converterse nun auténtico centro de vida, creatividade e sabor coa iniciativa 'Primavera no Mercado'. Esta ampla programación, aberta a todos os públicos, atraeu a máis de 400 persoas nos últimos dous meses, dinamizando a praza de abastos e achegando á veciñanza a calidade e proximidade dos produtos e servizos que ofrece este espazo emblemático. A iniciativa foi promovida pola Asociación de Praceiros e Praceiras do Mercado en colaboración co Concello de Tomiño.
Durante as últimas semanas, o mercado acolleu seis obradoiros con éxito rotundo e prazas completas. O Fogón do Mercado e a Floristería Marisa Baquero ofreceron formacións dinámicas sobre cociña e arte floral. Estas sesións foron unha oportunidade perfecta para experimentar co produto local, de tempada e de alta calidade, transformando o mercado nun lugar activo, creativo e participativo.
A música e a gastronomía tamén tiveron o seu momento estrela coas tres sesións dos "Sábados con sabor". Grupos como Allo Negro, Terapia de Grupo e Weli Kings puxeron a banda sonora mentres o público desfrutaba de exquisitas tapas elaboradas no propio mercado. Delicias como pastel de cabracho, empanada de millo con mexillóns, guiso de pota, montadiños de picaña, costela de porco con patacas, guiso de polbo e sepia con garabanzos ou tostas crocantes de porco fixeron as delicias dos asistentes, consolidando o mercado como un lugar de encontro e lecer.
"É unha alegría inmensa ver como o noso mercado se transforma nun punto de encontro para toda a veciñanza, enchéndose de música, aromas e actividades que poñen en valor o traballo das praceiras e praceiros e a calidade dos seus produtos", destaca a alcaldesa de Tomiño, Sandra González. A rexedora salientou que "este tipo de iniciativas son imprescindibles para dinamizar o comercio local e seguir facendo do mercado un espazo vivo, moderno e próximo, no que apetece estar".
Con iniciativas como esta, Tomiño reafirma o seu compromiso por fortalecer a economía local e seguir transformando o seu mercado nun auténtico motor social e cultural do municipio.