O Mercado Municipal de San Antonio de Tui consolídase como un referente na modernización do comercio de proximidade coa posta en marcha dun servizo innovador: taquillas intelixentes para a recollida de produtos fóra do horario habitual de apertura.
Este sistema pioneiro, xa plenamente operativo, consta de 10 taquillas refrixeradas e 5 sen refrixerar, instaladas na parte traseira exterior da praza. O seu obxectivo principal é facilitar a compra aos clientes, permitíndolles facer pedidos directamente aos vendedores do mercado —por teléfono ou outros medios acordados— e recollelos no momento que mellor lles veña, dun xeito cómodo, seguro e adaptado ao seu ritmo de vida. As taquillas refrixeradas garanten a correcta conservación dos produtos frescos, mentres que as normais son ideais para outros artigos.
A concelleira de Comercio, Ana Núñez, destacou que “este novo servizo reflicte o compromiso coa innovación e a comodidade dos usuarios e usuarias, nun mercado que se sitúa á vangarda tras a súa remodelación”. Núñez engadiu que “ademais das melloras nas instalacións interiores, completáronse tamén as obras da contorna, permitindo que o espazo acollera diversos eventos durante as festas, que serven para dar a coñecer o mercado a novos potenciais clientes”.
As taquillas intelixentes son unha peza clave no proceso de dixitalización do mercado e representan unha clara aposta pola modernización dos espazos tradicionais de venda. Esta iniciativa integra tecnoloxía de punta sen sacrificar a esencia do comercio local, ofrecendo unha solución funcional, moderna e eficiente que responde aos novos hábitos de consumo e fortalece o vínculo entre o mercado e a cidadanía de Tui.
Con esta aposta pola innovación, o Mercado de San Antonio reafirma o seu papel como espazo de referencia en Tui, combinando tradición, modernidade e proximidade para seguir sendo un punto central na vida diaria da localidade.
