A dous días da Romaría da Nosa Señora da Asunción, en Monte Castelo, Pesqueiras, Salvaterra de Miño, a expectación é máxima na comarca. Entre outras cousas porque este ano é de celebración do centenario da reforma da capela 1923-2023.
Neste fraternal encontro acompañarán á Virxe da Asunción diversas parroquias na romaría coas súas imaxes parroquiais xunto co acompañamento dos seus veciños e veciñas e romeiros e romeiras.
Oito advocacións subiran ao Monte Castelo, como son a Virxe de Fátima do Casal-Salvaterra; Virxe das Ermitas das Ermitas-Salvaterra; San Ramón de Soutolobre; Virxe do Carmen de Fiolledo, Virxe da Cabeza de Lourido; Virxe das Dores de Tortoreos; Virxe do Carme de Alxén, e San Miguel de Corzáns.
Segundo a organización, case “unha mini pascuilla, no monte Castelo, con saúdos fraternais á Nosa Señora da Asunción”. Ademais, tendo como convidado de honra, a imaxe da Ascensión do Señor presidindo a procesión santoral.
