A Praza do Concello acolleu este serán o acto de presentación da XXXII Festa dos Callos, o evento gastronómico que, como é tradición, porá o broche de ouro ás Festas do Cristo. A celebración central terá lugar este domingo, 5 de outubro, a partir das 12:00 horas.
O acto de lanzamento contou coa presenza do alcalde, Alejandro Lorenzo; os deputados provinciais, Jorge Cubela e Javier Tourís; o presidente da Asociación de Hostaleiros do Porriño, José Manuel Fernández, ademais de hostaleiros e representantes de diversas asociacións.
Innovación e Identidade
Nesta edición, a festa dá un paso adiante coa participación estelar do recoñecido cociñeiro galego con estrela Michelin, Yayo Daporta (membro do Grupo Nove), quen presentou unha receita exclusiva de callos que combina creatividade e respecto pola tradición. Daporta desvelou o "segredo" ante os asistentes, presentando dúas elaboracións singulares que se fusionan nun prato único: “callos de tenreira estofados como unha cochinita pibil” e “callos de bacallau ao pilpil”.
O alcalde, Alejandro Lorenzo, subliñou que a Festa dos Callos é "moito máis ca unha cita gastronómica, é un reflexo da nosa identidade como pobo, da nosa capacidade para mesturar tradición e innovación e da forza do noso tecido hostaleiro e social”. O rexedor convidou a veciños e visitantes de toda Galicia a achegarse o domingo para gozar dunha xornada onde se mesturan "a boa comida, o ambiente festivo e o orgullo de ser do Porriño".
Detalles da Degustación
A XXXII Festa dos Callos contará coa participación de 33 establecementos hostaleiros da vila, que ofrecerán as súas propias receitas do prato, poñendo en valor a diversidade e a creatividade da gastronomía local.
As racións poderán degustarse a un prezo único de 7 euros, que inclúe a ración de callos, pan e unha cazola de barro conmemorativa.
