A vila de Salvaterra de Miño prepárase para acoller a LXVI edición da Festa do Viño do Condado do Tea, un evento declarado de interese turístico de Galicia que se celebrará os días 29, 30 e 31 de agosto no seu emblemático recinto amurallado. A festa, que xa é a segunda máis antiga da comunidade, consolídase un ano máis como unha cita imprescindible do verán.
Como principal novidade, a organización volve apostar pola ampliación do espazo, que tan boa acollida tivo o ano pasado. O recinto ocuparase en toda a súa extensión, incluíndo a Praza do Castelo, onde se situará un segundo escenario e máis mesas para asegurar a comodidade dos visitantes.
Nesta edición, a oferta enolóxica será a máis ampla da historia do evento. Participarán un total de 29 adegas, ofrecendo aos asistentes a oportunidade de degustar máis de 100 referencias de viños. Para acompañar, haberá numerosos postos de comida.
A programación musical tamén será protagonista, coa presenza de nove grupos que animarán as noites do venres e do sábado. A veciñanza e visitantes poderán gozar dos concertos de Galifunk Brass, De Ninghures, G-Face, La MMarca, Os D'Abaixo, O Caimán do Río Tea, Lenha Verde, Son das Tabernas e La Trío Machine. O domingo pola mañá, os grupos folclóricos locais poñerán a nota tradicional á xornada.
O pregón e outras actividades
O actor, presentador e produtor Rubén Riós será o encargado de dar o pregón o domingo ás 13:00h, despois do acto de recoñecemento dos "viños deliciosos do ano". Antes diso, celebrarase o XXXII Gran Capítulo da Cofradía do Viño Condado do Tea e Espumosos, no que se nomearán os novos cofrades.
A festa inaugurarase oficialmente o venres 29 ás 20:00h. Con todo, as actividades comezarán días antes coas catas comentadas gratuítas, que terán lugar na Casa do Viño do 25 ao 29 de agosto.
Ademais, volve o Túnel do Viño, que permitirá degustar todos os viños da subzona do Condado do Tea por só 15 euros o venres 29 e o sábado 30. As inscricións tanto para as catas como para o túnel pódense facer a través do teléfono 617 148 866 ou no correo electrónico museocienciavino@concellodesalvaterra.org.
O Pregonero da Festa do Viño do Condado do Tea
O pregoeiro desta LXVI edición é Rubén Rodríguez Rodríguez, coñecido artisticamente como Rubén Riós. Este actor e produtor, orixinario de Riós, en Ourense, ten unha longa e destacada traxectoria no panorama audiovisual galego.
Tras formarse na Escola Municipal de Teatro de Vigo, comezou a súa carreira na Televisión de Galicia. A súa grande oportunidade chegou no 2004, cando se converteu nun dos protagonistas da exitosa serie Libro de familia, interpretando o papel de Marcos.
En 2007, Rubén Riós deu o salto á gran pantalla coa película Pradolongo de Ignacio Vilar. Ese mesmo ano, fundou a produtora Claqueta Coqueta S.L. co obxectivo de fomentar a cultura galega, converténdose nunha das principais produtoras da comunidade. Tamén é o director do Festival das Artes Escénicas de Riós Abelardo Gabriel, na súa vila natal.
A súa versatilidade levouno a dirixir e producir as curtametraxes Adeus Edrada? e Coser e cantar, coas que gañou o Premio Mestre Mateo ao mellor curtametraxe. En 2012, volveu a colaborar con Ignacio Vilar como protagonista da película Vilamor. Tamén é o responsable do documental Máis ca vida e da curtametraxe Vida, proxectos que dan visibilidade a persoas con capacidades diferentes.
Ademais da súa carreira no audiovisual, Rubén Riós é cofundador da empresa Castañam S.L., dedicada á elaboración de produtos innovadores a partir da castaña, e creador de "Ruralizarte", unhas xornadas para visibilizar o talento dos máis novos no rural galego.
A súa contribución á cultura galega foi recoñecida en 2013 co Premio Rebulir de cultura galega pola defensa do rural e a identidade galega como recurso no ámbito audiovisual.
