O Concello de Nigrán anunciou o comezo este martes das obras de emerxencia en Praia América para reparar os graves danos provocados polos temporais deste inverno. As actuacións, financiadas por Costas do Estado cun investimento de 220.000 euros —dun total de 320.000 na provincia—, centraranse na recuperación do sistema dunar e na reordenación do areal para frear a erosión.
Os sucesivos temporais de inicio de ano causaron importantes desprendementos na duna da zona de Panxón, afectando pasarelas de madeira, duchas e a varanda de aceiro inoxidable do paseo marítimo, ademais do seu pavimento. Segundo o Concello, nunca desde que hai rexistros fotográficos (1948) o río chegara a ameazar de tal forma este ecosistema.
As obras, cun prazo estimado de dúas semanas, consistirán en grandes movementos de area para restaurar a dinámica natural do areal e reconducir a canle do río cara a unha saída máis directa ao mar, evitando o actual meandro que impacta na duna. Tamén se eliminará un dos accesos peonís intermedios para reforzar a protección dunar cun único bloque continuo, que será blindado cunha malla.
Ademais, arranxarase a pasarela de madeira de acceso á praia, mentres que a rehabilitación do paseo de Panxón quedará fóra desta actuación e será asumida polo Concello con fondos propios, cunha partida prevista de 200.000 euros.
O alcalde, Juan González, destacou que se trata dunha intervención “rápida e sostible” para favorecer a rexeneración ambiental e adaptarse ao impacto do cambio climático, agradecendo a colaboración e a resposta áxil de Costas do Estado.
