O claustro da Catedral de Tui inaugurará mañá ás 12.45 horas a XI Mostra da Camelia, con 75 expositores de Galicia, Asturias e Portugal e 123 metros de exposición. A cita, que se suma aos actos do 800 aniversario da consagración do templo, poderá visitarse durante toda a fin de semana.
A Catedral de Tui acolle a inauguración da XI Mostra da Camelia Cidade de Tui
16 de enero de 2026, 23:03
O claustro da Catedral de Tui será escenario mañá, ás 12.45 horas, da inauguración da XI Mostra da Camelia Cidade de Tui, organizada polo Concello de Tui e ATUCA, Amigos Tudenses da Camelia. O evento reunirá 75 expositores de Galicia, Asturias e Portugal, que achegarán ao público distintas variedades e tamén innovacións arredor desta flor da invernía. A cita súmase, ademais, aos actos conmemorativos do 800 aniversario da consagración da Catedral de Tui.
A mostra contará con 123 metros de exposición, nos que se poderán admirar composicións elaboradas con mimo e enxeño para poñer en valor a camelia. O horario de apertura ao público será mañá sábado de 16.45 a 20.30 horas e o domingo de 10.00 a 14.00 horas e de 16.30 a 20.00 horas.
A programación inclúe tamén actividades paralelas e actuacións. Coincidindo coa inauguración, actuará a Asociación do Traxe Tradicional de Tui, mentres que a clausura do domingo contará coa Rondalla O Mosteiro de Pexegueiro, que iniciará un pasarrúas dende a Corredoira ás 17.30 horas. Ademais, mañá ás 17.30 horas, no Espazo Sociocultural, celebrarase unha charla-degustación de té.
A XI Mostra da Camelia Cidade de Tui preséntase esta fin de semana como unha cita imprescindible para as persoas afeccionadas a esta flor e como un evento de referencia que pon en valor o patrimonio natural e cultural da cidade.
